తాత పేరు నిలబెట్టాలి.. రామ్మోహన్ నాయుడు కుమారుడికి అచ్చెన్న ఆశీస్సులు

కేంద్ర పౌర విమానయాన శాఖ మంత్రి కింజరాపు రామ్మోహన్ నాయుడు ఇంట పండుగ వాతావరణం నెలకొంది. ఆయన కుమారుడి నామకరణ మహోత్సవం ఆదివారం ఢిల్లీలో కుటుంబ సభ్యుల మధ్య ఘనంగా జరిగింది. ఈ వేడుకకు ఏపీ మంత్రి, రామ్మోహన్ నాయుడికి బాబాయ్ అయిన కింజరాపు అచ్చెన్నాయుడు తన కుటుంబంతో సహా హాజరయ్యారు. చిన్నారికి 'శివాన్ ఎర్రన్నాయుడు' అని నామకరణం చేసినట్లు ఆయన వెల్లడించారు.

ఈ సందర్భంగా అచ్చెన్నాయుడు తన ఆనందాన్ని పంచుకున్నారు. చిన్నారిని మనస్ఫూర్తిగా ఆశీర్వదించినట్లు తెలిపారు. "ఢిల్లీ గడ్డ మీద మారుమోగిన కింజరాపు వారి ఇంటి పేరుని నిలబెట్టి, తాతకు తగ్గ మనవడిగా, తండ్రికి మించిన తనయుడిగా శివాన్ ఎదగాలని మనస్ఫూర్తిగా ఆకాంక్షిస్తున్నాను" అని ఆయన అన్నారు.

దివంగత నేత, తన అన్నయ్య అయిన ఎర్రన్నాయుడి పేరు కలిసివచ్చేలా మనవడికి పేరు పెట్టడం సంతోషంగా ఉందని అచ్చెన్నాయుడు పేర్కొన్నారు. చిన్నారి శివాన్ ఎర్రన్నాయుడికి అష్టైశ్వర్యాలతో, పరిపూర్ణ ఆరోగ్యంతో నిండు నూరేళ్లు ప్రసాదించాలని కలియుగ దైవం శ్రీ వెంకటేశ్వర స్వామిని ప్రార్థిస్తున్నట్లు ఆయన వివరించారు. ఈ వేడుకకు సంబంధించిన ఫోటోలను ఆయన సోషల్ మీడియాలో పంచుకున్నారు.